Chakwera, mavenda achigawo chakumvuma agwirizana zogwira ntchito limodzi potukula Malawi
Mtsogoleri wa dziko la Dr. Lazarus McCarthy Chakwera Lachinayi madzulo adakumana ndi kukambirana ndi ochita malonda ochokera ku chigawo chakumvuma cha dziko pofuna kulimbikitsa ubale ndi umodzi potukula Malawi.
Mkumanowo udachitikira ku nyumba ya boma ya Chikoko Bay State Lodge ndipo udayitanitsidwa ndi cholinga chowapatsa mavendawa mwayi wokumana ndi mtsogoleri wa dziko.
Polankhula pa mkumanowo, Chakwera adati iye akudziwa mavuto omwe ochita malonda akukumana nawo mdziko muno ndipo anatsindika za kudzipereka kwa boma lake kuthana ndi mavutowo.
Mtsogoleriyu anati ochita malonda ali ndi gawo lalikulu kwambiri pa ntchito yotukula dziko lino.
Chakwera anati ichi ndi chifukwa chake boma lakhazikitsa ngongole zosiyanasiyana pofuna kuthandiza amalonda kupeza mpamba wopititsira patsogolo mabizinesi awo.
M’mau awo, mavenda anathokoza mtsogoleriyu kaamba kowapatsa mpata wokumana nawo komanso kumva madandaulo awo.
Follow and Subscribe Nyasa TV :
