Chakwera wayamba kugawa chakudya kwa a Malawi osowa: Mabanja 1200 athandizidwa ku Mulanje
Ntchito yogawa chimanga ku mabanja omwe akhudzidwa ndi njala m’boma la Mulanje yayamba lero, lolemba kwa Mthiramanja komwe mabanja 1200 alandira chimangachi.
DC wa boma la Mulanje a David Kayiwonanga Gondwe ati mabanja 69,497 ndiwo alandire chimanga m’boma lonse la Mulanje kwa miyezi isanu m’bomali.
A Gondwe apempha anthu kuti apewe chisokonezo ndi ziwawa pa nthawi yomwe akulandira chimangachi.
Mmodzi wa anthu omwe alandira chimangachi a Stellia Mwanakomba a mmudzi wa Kululira ati thandizoli lafika pa nthawi yake pamene mnyumba mwawo munalibe chakudya chilichonse.
Malinga ndi lipoti la bungwe la Malawi Vulnerability Assessment Committee (MVAC), anthu 5.7 million ndiwo akhudziwa kwambiri ndi njala ndipo akufunika thandizo la chakudya.
Follow and Subscribe Nyasa TV :
